Обамагийн илтгэл “А” үнэлгээ авав

Өнөөдрийн түүх Бараг Хусейн Обамагийнх болов. Энэ өдөр тэрээр дэлхийн хүчирхэг гүрний 44 дэх төрийн Тэргүүнээр сонгогдож, шинэ түүх бүтээж, шинэ цаг үеийг түүчээлэн эхлүүлж байна. Хувь хүнийх нь хувьд гоц сайхан үйл явдал бөгөөд, улс үндэстнийх нь хувьд онцгой тэмдэглэлт өдөр юм. Обама товлосон цагаас 5 минут хэтэрсэн хойно, 12.05 цагт Вашингтонд Ерөнхийлөгчийн тангаргаа өргөх үед 1 сая гаруй хүн цуглараад байлаа. Харин Америк болоод дэлхий дахинд хэдэн тэрбум хүн нэгэн зэрэг түүний үг бүрийг, үйлдэл болгонтой нь ажиглаж байв. Индианагийн Их Сургуулийн Хуулийн Сургуульд профессорууд оюутнуудынхаа хамтаар том танхимд шинэ ерөнхийлөгчийнхөө илтгэлийг үзэж онцгой хөөр хөгжөөнтэй тэмдэглэлээ. Түүний илтгэлийг шүүмжлэх хүн ховор бөгөөд ёслолын ажиллагаан дээр хэн хэн ирсэн, Обама хэрхэн үгээ хэлсэн, ямархуу харагдаж байсныг ам булаалдан ярилцана.

Линкольн Ерөнхийлөгч болохдоо мутарлаж байсан Библи дээр Обама гараа тавин яг тангараг өргөж эхлэхдээ Дээд Шүүхийн Тэргүүн шүүгчийн хөтлөн явуулсан давтан хэлэх хэсэг үгийг мартаж нэг үг “гээж” Ерөнхийлөгч болов. Гээсэн үг нь “Office” гэсэн үг байв. Ямартаа ч түүний илтгэлийг Америкийн тэргүүлэх мэдээллийн агентлагууд болоод судлаач, шүүмжлэгчид дүгнэж гарав. Обама бараг анхны цээжээр илтгэлээ тавьсан Ерөнхийлөгч болох шиг боллоо. Үгээ харж уншдаг хажуугийн электрон самбар байсангүй. Индэр дээр нь илтгэлийнх нь нэг хувь байсан боловч түүнд нэг ч секунд зарцуулсангүй. Үүгээрээ онцлог болов. Обамагийн илтгэлд CNN “А” гэсэн үнэлгээ өгч байна. Энэ үнэлгээг өгөхийн тулд тэнцвэртэй дүгнэх үүднээс БНН намын хоёр, Ардчилсан намын хоёр, мөн CNN-ийн нөлөө бүхий судлаачдаас үнэлгээ авсан байна. Эдэн дотор Америкийн дөрвөн Ерөнхийлөгчийн туслах, үг бичигч Дэвид Гөргэн гуай хүртэл орсон нь сэтгэл хөөрлөөс ангид хамгийн бодитой үнэлгээ болов уу.

1. Үнэлгээ “А”
Ардчилсан намын стратегич Паул Бегала: (Paul Begala)
Мартин Лютер Кинг “Би мөрөөдөж байна” илтгэлээ тавьж байхыг Ерөнхийлөгч Кеннеди үзээд “Тэр үнэхээр сайн байна, бүр солиотой сайн байна” гэж хэлж байсан юм. Би өнөөдөр Кеннеди хэрхэн Кингийг үнэлсэн шиг Обамаг ч тэгж үнэлхийг хүсч байна.

2. Үнэлгээ “В”
БНН-ын стратегич Лэсли Санчез: (Leslie Sanchez)
Түүний илтгэл үндсэндээ давгүй боллоо. Гэвч олон улсын болоод дотоодын асуудалд чиглэсэн гол санаа нь тодорхойгүй байлаа.

3. Үнэлгээ “А”
Улс төрийн тэргүүлэх шинжээч Дэвид Гөргэн: (David Gergen)
Обама мөнхөд дуурсагдах гэхээсээ илүүтэйгээр энэ цагт үедээ яв цав тохирсон илтгэлийг гайхалтай сайхан тавьсан бөгөөд түүнийгээ ч үнэхээр сайн биелүүллээ. Энэхүү илтгэл нь дэлхий нийтийн анхаарлыг соронзон мэт татах болно.

4. Үнэлгээ “В”
БНН-ын стратегич Алекс Кастелланос: (Alex Caste llanos)
Шинэ болоод олон үндэсний бүрдэл болсон Америкийн тухай уламжлалт илтгэл боллоо. Өөрчлөлтийг амлаж буй нэр дэвшигч маань тогтвортой байдал хийгээд хөгжил дэвшлийн Ерөнхийлөгч болж байна. Илтгэлийг дүгнэж үзвэл хасах “В” үнэлгээтэй эхэлж нэмэх “А” үнэлгээгээр өндөрлөлөө. (Нэг үгээр бол эхлэл нь энгийн бөгөөд маш сайн төгсгөлтэй боллоо. С.Э) (Дунджаар “В”)

5. Үнэлгээ “А”
CNN-ий Сэтгүүлч Хиллари Росэн: (Hilary Rosen)
Тэр үгээ үнэхээр сайн хүргэж чадлаа. Маш гайхалтай бөгөөд хүчирхэг үгээрээ тэр бидэнд иргэн хүний маань үнэ цэнэ болоод амлалтыг сануулж өглөө. Тэрээр хэлэхдээ бидний итгэл найдвар амьд бөгөөд үүнийгээ ч тэр илтгэлээрээ баталж чадлаа.

Сүхбаатарын Эрдэнэболд
Индианагийн Их Сургуулийн Хуулийн Сургууль

http://www.cnn.com/2009/POLITICS/01/20/speech.report.card/index.html